Côr Cymraeg Abertawe

CYNGHERDDAU’R HAF

Bu digwyddiad arbennig ddydd Sadwrn, Gorffennaf 10.  Priododd Elanna, merch Enid sy’n canu gyda’r sopranos, ym Methel Sgeti, a bu’r côr yn canu yn ystod y gwasanaeth. Daeth hyn â gweithgareddau’r côr i ben am yr haf.  Bydd y côr yn ailgychwyn nos Fercher, Medi 8.

Nos Wener, Gorffennaf 2, cynhaliodd Côr gyngerdd i ddathlu agor Festri newydd Bethel, Sgeti.  Cafwyd hwyl ar ganu’r Utgorn a Ddiogyn Bach, a hefyd Ym Mhenrhyn Gwyr, ymhlith eitemau eraill.  Roedd dwy unawdydd - Abigail Sara ac Eleri Gwilym, a chafwyd datganiad ar y delyn gan Elin Samuel.

CD YN GWERTHU’N WYCH

Mae CD Côr Ty Tawe eisoes yn tynnu am £3,000 o ran gwerthiant.  Cafodd y CD hwb pan ddaeth teledu Tinopolis i ffilmio’r noson lansio ym mwyty Truffles yn Heol Brynymor, Abertawe.

‘Ym Mhenrhyn Gŵyr’, cerdd ddiweddar gan Mererid Hopwood, gyda cherddoriaeth wedi’i chyfansoddi’n arbennig gan Eric Jones i Gôr Tŷ Tawe a Helen Gibbon, yw cân deitl CD newydd Côr Tŷ Tawe.

Mae’r CD yn cynnwys caneuon amrywiol gan y côr, ac unawdau a deuawdau gan Helen Gibbon, yr arweinydd, a Sion Goronwy, y canwr bas o’r Bala.

Mae Côr Tŷ Tawe, a sefydlwyd ugain mlynedd yn ôl i hyrwyddo canu corawl Cymraeg yn Abertawe, wedi cael blwyddyn brysur. Cynhaliodd wyth o gyngherddau yn Abertawe a gorllewin Cymru, a mynd ar daith i Gdansk, Gwlad Pŵyl. Hon oedd unfed daith dramor ar ddeg y côr, sydd wedi bod i’r Almaen, Awstria, Iwerddon, Catalwnia, Gweriniaeth Tsiec a Gwlad Pŵyl.

Cododd y côr arian i sawl cronfa elusennol, gan gynnwys cronfa goffa Sera Leyshon a oedd yn aelod o’r côr, a chronfa Yogi, o’r Bala.

Helen Gibbon, athrawes o Gapel Dewi, yw arweinydd y côr. Mae hi wedi ennill y wobr gyntaf ar ganu soprano bedair gwaith yn yr Eisteddfod Genedlaethol. Ei chefnder, John Evans, a fu’n athro chwythbrennau, yw cyfeilydd y côr.

Bu Sion Goronwy, sy’n datblygu gyrfa ryngwladol fel canwr opera, yn canu gyda’r côr yn Berlin a Wittenberg, ac mewn cyngerdd ger y Bala. Mae ganddo ddwy unawd ar y CD, a dwy ddeuawd gyda Helen a’r côr.

Dyma ail CD y côr. Cynhyrchwyd a chyhoeddwyd ef gan Gwmni Fflach o Aberteifi. Mae ar gael gan swyddogion y côr, (gw. ‘Pwy yw Pwy’) a thrwy Siop Tŷ Tawe am £10..

Taith i Gdansk, Gwlad Pwyl, oedd uchafbwynt 2009 i Côr Tŷ Tawe.  Aeth 22 o gantorion ar y daith, Ebrill 14-19, a chanu yn y Brifysgol yn Gdansk a hefyd yn un o eglwysi mawr y maestrefi.  Roedd y gwesty ger sgâr Solidarnosc. Cafwyd cyfle i weld canol y dref a ailadeiladwyd yn gain ar ôl dinistr y rhyfel.  Mae rhagor am y daith hon i’w weld ar dudalen Teithiau y wefan.

Sefydlwyd Côr Tŷ Tawe yn 1990 yn gôr pedwar llais i siaradwyr Cymraeg a dysgwyr Abertawe a’r cylch. (Tŷ Tawe yw canolfan Gymraeg Abertawe.)   (llun: Lluniau Llwyfan; gwefan: lluniaullwyfan.com)

Bu’r côr yn cynnal cyngherddau ledled de Cymru, ac enillodd y gystadleuaeth i gorau bach yng Ngŵyl Ban-Geltaidd Iwerddon bedair gwaith.

Mae’r côr hefyd wedi teithio’n eang, gan gynnwys cyngherddau yn yr Almaen, Awstria, Gwlad Pŵyl, a Phrâg, lle y canodd mewn cyngherddau yn Eglwys St Nicolas, ar yr hen sgwâr, ac yn neuadd y dref, Nusle. Bu’r côr ar daith i Awstria a’r Almaen yn 2004 gyda chyngherddau yn eglwys gadeiriol Salzburg, Mondsee, Zell am See a Grafing ger Munich.

Yn 2005 teithiodd i Berlin a Wittenberg, ac yn 2007 bu’n canu yn eglwys gadeiriol Barcelona, eglwys abaty Montserrat ac eglwys St Pacia.

Mae’r côr yn canu amrywiaeth o alawon gwerin, emynau a chaneuon modern a darnau clasurol.

Cychwynnodd y côr yn gôr i bobl ifanc, ac mae’n dal i roi lle amlwg i’r aelodau iau.

Mae’r côr yn croesawu aelodau newydd: cysylltwch os ydych chi’n gallu canu - mae’r manylion cyswllt yn yr adran ‘Cysylltu’ > ‘Ymuno’.

Mae’r côr hefyd yn croesawu ceisiadau ar gyfer cyngherddau: mae’r manylion yn yr adran ‘Cysylltu’ > ‘Trefnu cyngerdd?’

RY’N NI’N EDRYCH MLAEN I GLYWED ‘DA CHI.

(For information in English, please click on the ‘English’ page.)