Côr Tŷ Tawe

CD Ym Mhenrhyn Gwyr

Catrin — Sun, 13 Dec 2009 17:38:46 +0000

CERDD MERERID HOPWOOD YN GAN DEITL I CD COR TY TAWE

‘Ym Mhenrhyn Gŵyr’, cerdd ddiweddar gan Mererid Hopwood, gyda cherddoriaeth wedi’i chyfansoddi’n arbennig gan Eric Jones i Gôr Tŷ Tawe a Helen Gibbon, yw cân deitl CD newydd Côr Tŷ Tawe.

Mae’r CD yn cynnwys caneuon amrywiol gan y côr, ac unawdau a deuawdau gan Helen Gibbon, yr arweinydd, a Sion Goronwy, y canwr bas o’r Bala.

Mae Côr Tŷ Tawe, a sefydlwyd ugain mlynedd yn ôl i hyrwyddo canu corawl Cymraeg yn Abertawe, wedi cael blwyddyn brysur. Cynhaliodd wyth o gyngherddau yn Abertawe a gorllewin Cymru, a mynd ar daith i Gdansk, Gwlad Pŵyl. Hon oedd unfed daith dramor ar ddeg y côr, sydd wedi bod i’r Almaen, Awstria, Iwerddon, Catalwnia, Gweriniaeth Tsiec a Gwlad Pŵyl.

Cododd y côr arian i sawl cronfa elusennol, gan gynnwys cronfa goffa Sera Leyshon a oedd yn aelod o’r côr, a chronfa Yogi, o’r Bala.

Helen Gibbon, athrawes o Gapel Dewi, yw arweinydd y côr. Mae hi wedi ennill y wobr gyntaf ar ganu soprano bedair gwaith yn yr Eisteddfod Genedlaethol. Ei chefnder, John Evans, a fu’n athro chwythbrennau, yw cyfeilydd y côr.

Bu Sion Goronwy, sy’n datblygu gyrfa ryngwladol fel canwr opera, yn canu gyda’r côr yn Berlin a Wittenberg, ac mewn cyngerdd ger y Bala. Mae ganddo ddwy unawd ar y CD, a dwy ddeuawd gyda Helen a’r côr.

Dyma ail CD y côr. Cynhyrchwyd a chyhoeddwyd ef gan Gwmni Fflach o Aberteifi. Mae ar gael gan aelodau’r côr, trwy wefan y côr (www.cortytawe.org) a thrwy Siop Tŷ Tawe am £10..

Recordio CD

admin — Mon, 26 Oct 2009 09:13:25 +0000

Daeth y sesiynau recordio CD yng Nghapel y Babell, Caerfyrddin, i ben.

Recordiwyd deg o ganeuon, gyda Sion Goronwy a Helen Gibbon yn canu Benedictus, Rhisiart Arwel. Recordiodd Helen Sion hefyd ganeuon ar gyfer y CD.

Cyngerdd Capel Awst

Catrin — Thu, 08 Oct 2009 23:36:48 +0000

Cynhaliwyd cyngerdd llwyddiannus yng Nghapel Awst, Caerfyrddin, nos Iau Hydref 8, 2009. Daeth cynulliad da ynghyd, a chanodd y côr lawer o’r caneuon a fydd ar y CD newydd. Yn eu plith roedd Ym Mhenrhyn Gwyr, geiriau Mererid Hopwood, cerddoriaeth Eric Jones, a gyfansoddwyd yn benodol i’r côr.

Canodd angharad Thomas ddwy gân werin a hefyd osodiad Edgar Hughson o ‘Calon Lân’. Canodd Helen Gibbon Min y Mor gan Eric JOnes, a chanodd y ddwy O Hyfryd Hedd, o Jwdas Macabeus, Handel, a Benedictus, Robat Arwyn, gyda’r côr.

Paratowyd gwledd i’r côr gan aelodau’r capel ar ôl y gyngerdd.

Llongyfarchiadau

Catrin — Tue, 11 Aug 2009 18:19:08 +0000

Llongyfarchiadau i Helen ein harweinydd ar ddod yn 3edd yn y gystadleuaeth Lieder (39 yn cystadlu) a hefyd yn 3ydd yn y gystadleuaeth Mezzo-soprano yn Eisteddfod Genedlaethol Meirionydd a’r cylch eleni. Dyma’r tro cyntaf iddi gystadlu yn y gystadleuaeth hon. Cafodd ganmoliaeth uchel gan y beirniaid.

Gdansk, Ebrill 2009

Heini — Sun, 10 May 2009 09:12:36 +0000

Cafodd y côr daith lwyddiannus iawn i Gdansk ar ôl y Pasg.

Cafwyd dwy gyngerdd, y naill yn y Brifysgol a’r llall mewn eglwys newydd yn un o’r maestrefi mawr. Roedd y cynulleidfaoedd o gant a hanner yn y ddau le wrth eu bodd gyda’r côr, ac ar eu traed yn dilyn cymeradwyaeth frwd.

Roedd y cyngherddau’n cynnwys eitemau crefyddol a Chymreig gan y côr, unawdau gan Helen Gibbon ac unawdau ar yr organ gan Fiona Gannon, gyda John Evans yn cyfeilio’n wych yn ôl ei arfer.

Cafodd y côr gyfle i weld rhai o uchafbwyntiau’r ardal, gan gynnwys yr hen dref, castell Malobork, yr eglwys gadeiriol ym mharc Oliwa a sgwâr Solidarnosc, a oedd ger y gwesty.

(Lluniau: Catrin, Helen, Heini)

Eisteddfod yr Hendy

Heini — Sun, 10 May 2009 09:04:53 +0000

Roedd y côr yn fuddugol yn Eisteddfod yr Hendy a gynhaliwyd nos Sadwrn, Mai 9, 2009, gan dderbyn gwobr hael o £300 a’r cwpan a gyflwynwyd i’r Eisteddfod gan yr Eglwysi Rhyddion.

Y beirniad oedd Alun Guy. Canmolodd y dewis o ddau ddarn uchelgeisiol, Y Aderyn o waith Brian Huges ac Ym Mhenrhyn Gwyr, geiriau Mererid Hopwood, a’r gerddoriaeth wedi ei chyfansoddi gan Eric Jones yn arbennig i Helen Gibbon, arweinydd y côr ac i Gôr Ty Tawe.

Dyma’r perfformiad cyntaf o Ym Mhenrhyn Gwyr.

Canmolodd Alun Guy sawl elfen o ganu’r côr a’r dehongliad o ddau ddarn tra gwahanol, a rhoddodd glod arbennig hefyd i John Evans y cyfeilydd.

(Lluniau: Peggi Rodgers)

Yn Stiwdio Heno

Catrin — Tue, 03 Mar 2009 12:49:13 +0000

Oeddech chi’n canu gyda’r côr yn gynnar yn y 90au? Does dim llawer o’r rhain yn dal i ganu gyda’r côr. Cysylltwch i ddweud.

Taith Iwerddon 199?

Catrin — Fri, 19 Dec 2008 22:41:14 +0000

Un o deithiau cynnar y côr i’r Wyl Ban-geltaidd yn Tralee, (ennill wrth gwrs!) ac ambell un o’r cor yn edrych dipyn yn iau, yn eu plith Angharad, Heledd Mitchell, Ceri Anwen a John…

Linda a Catrin yn edrych tua’r un oed â nawr

Helen a Gwyn y tu allan i dafarn, yn gosod y safon

Gwyn a Helen ar y mynydd

Cyngerdd Cwmann

Heini — Mon, 15 Dec 2008 01:17:17 +0000

Helen yn yr eglwys

Noson oer o Ragfyr, sêr yn pefrio, y lleuad yn codi uwch ysgwydd y bryn, ac eglwys gynnes, lawn.

Paratoi cyn y gyngerdd

Cafodd aelodau’r côr noson wrth eu bodd yng Nghwmann nos Sul, Rhagfyr 14, 2008. Gyda Helen yn arwain ac yn canu, Teifryn yn canu unawdau traddodiadol a charolau, a’r côr yn canu detholiad o’i hoff ganeuon a charolau, cafwyd cyngerdd lwyddiannus. A digon o fwyd wedyn yn y neuadd, gan gynnwys teisennau sbwng cartref arbennig.

Cyflwynwyd y noson gan yr Hybarch Andy John, ficer Pencarreg sydd wedi ei ethol yn esgob Bangor.

Roedd hi’n rhewi’r tu allan, ond yn gynnes o ran gwres ac ysbryd y tu mewn.

Ar y ffordd adre…

Neges gan Dylan:

Llongyfarchiadau ar gyngerdd hyfryd nos Sul yng Nghwmann. Sain arbennig iawn i’r canu. Neis iawn eich gweld i gyd eto. Edrych mlaen i’ch clywed eto yn yr ardal.

Nadolig Llawen i bawb yn y cor.

Cofion

Dylan

Parti Dolig

Heini — Sun, 14 Dec 2008 02:11:11 +0000

Cafwyd parti Dolig heb ei ail yn Rhif 13 Abertawe.

Lle cynnes, bwyd da, digon o gwmni..

Dyma ambell lun i gofio’r achlysur.