Mae Côr Ty Tawe yn hynod falch o gyhoeddi penodiad Dr Edward-Rhys Harry fel Arweinydd y Côr o fis Medi 2025.

Yn wreiddiol o Benclawdd, mae Dr Harry yn arweinydd corawl a chyfansoddwr o fri rhyngwladol, sy’n parhau i fod yn agos at ei wreiddiau ym Mhenrhyn Gwŷr. Mae’n angerddol am gerddoriaeth Gymraeg a’r pŵer sydd gan gerddoriaeth i gryfhau cymunedau a Chymreictod yn Abertawe a’r cylch.

Dr Harry oedd y Cymro cyntaf i raddio mewn Arwain Corawl yng Ngholeg Cerdd a Drama Cymru, ac yn 2022 enillodd Dlws y Cerddor yn Eisteddfod Genedlaethol Tregaron am ei opera siambr Gymraeg ‘Yr Islawr’.

Mae Dr Harry hefyd yn Rheolwr Datblygu a Llesiant Cerddorol i Military Wives Choirs, ac yn Gyfansoddwr Preswyl i Music for Life. Mae’n dod â chefndir cerddorol amrywiol sydd wedi ymestyn i neuaddau cyngerdd, tai opera, eglwysi cadeiriol a sianeli radio ledled y byd.

Bydd y Côr yn ail-ddechrau ar nos Lun Medi 8 am 7 o’r gloch. Mae’r Côr yn croesawu aelodau newydd, ac mae’n agored i siaradwyr a dysgwyr Cymraeg ar bob lefel sy’n chwilio am brofiad cerddorol cwbl Gymraeg.

Bydd penodiad Dr Harry yn nodi cyfnod newydd ac ysbrydoledig i Gôr Ty Tawe, gan gynnig cyfleoedd cerddorol newydd i aelodau’r Côr ac i’r gymuned ehangach.

Fiona Gannon yn gyfeilydd

Bydd Côr Ty Tawe hefyd yn ennill cyfeilydd newydd, Fiona Gannon. Cyfieithydd yw Fiona wrth ei gwaith. Bu’n ddarlithydd ym Mhrifysgol Abertawe, Hi yw arweinydd Capel y Nant, Clydach, ac mae’n rhedeg siop O law i law yng Nghlydach, sy’n codi arian i Ty Croeso, Clydach. Mae ganddi brofiad helaeth o ganu’r piano a’r organ a nifer o offerynnau eraill. Bu’n unawdydd ar yr organ yn nifer o gyngherddau Côr Ty Tawe yng Nghymru ac ar y cyfandir a chynhaliodd gyngherddau organ yn Neuadd Brangwyn, Abertawe..

Cafodd Côr Tŷ Tawe noson braf o haf i ddathlu diwedd y flwyddyn. Cynhaiwyd y noson ganol Gorffennaf 2025 yn nhŷ Clem, un o’r altos.

Yn ysod y noson anrhegwyd Bethan Wynne Phillips sy’n ymadael â’r côr ar ôl treulio dwy flynedd lwyddiannus yn arwain ac yn cyfeilio.

Mae croeso i aelodau newydd ddod 8 Medi pan fydd y côr yn ailgychwyn gydag arweinydd a chyfeilydd newydd.

Fore Sadwrn y 12fed o Orffennaf 2025 canodd Côr Ty Tawe am y tro olaf o dan arweiniad Bethan Wynne Phillips.

Ar ôl dwy flynedd lwyddiannus iawn gyda’r côr, mae Bethan yn symud ymlaen i ddatblygu ei gyrfa fel therapydd cerdd.

Canodd y côr ddetholiad o ganeuon Cymraeg i gynulleidfa werthfawrogol yn neuadd Eglwys Ystumllwynarth.

Bydd y côr yn gweld ei heisiau’n fawr gan iddi fod yn arweinydd a chyfeilydd. Yn ystod ei chyfnod gyda’r côr cynyddodd yr aelodaeth, a chynhaliwyd nifer dda o gyngherddau gan gynnwys cyngerdd yng Nghapel y Boro, Llundain.

Bydd y côr yn ailgychwyn 8 Medi gydag arweinydd a chyfeilydd newydd- manylion cyffrous i ddo

Cafodd y côr daith lwyddiannus i Lundain ym mis Chwefror, 2025. Gwahoddwyd y côr i ganu yng Nghapel y Boro, Southwark, gan rannu cyngerdd gyda Chôr y Boro. Roedd yn brofiad arbennig. Canodd y côr nifer o eitemau, gan gynnwys tair eitem ar y cyd â Chôr y Boro, gan orffen gyda datganiad o’r Tangnefeddwyd, trefniant Eric Jones, a Hafan Gobaith. Roedd gwledd helaeth i bawb wedi’i pharatoi ar ôl y gyngerdd.

Cafodd y côr gyfle i ganu ddwywaith yn nathliadau ‘Croeso’ Gwyl Ddewi Abertawe, 2025, y tro cyntaf yn y llwyfan agored ger y bont newydd, ac yn ail, yn y farchnad. Bu tipyn o hwyl ar y canu. Mae’r côr yn awr yn edrych ymlaen at ganu yn Ystumllwynarth ac yn Llandeiloferwallt yr haf yma.

Cafodd y côr, dan arweiniad Bethan Wynne Phillips, groeso mawr gan yr Athro Prys Morgan yng nghyfarfod Cymdeithas Gymraeg Llandeiloferwallt nos Lun, 16 Mehefin. Canon nhw’r eitemau hyn:

Fflabalam = traddodiadol – trefniant W Tudor Jones; Popeth hardd sydd yn y byd – John Rutter; Y cyfan sydd gen i i’w roi – Robin Llwyd ab Owain, Robat Arwyn; Dashenka – Islwyn Ffowc Elis; Y Cwm = Huw Chiswell, trefniant Alun Guy; Ar lan y môr – traddodiadol, trefniant Alan Llewelyn Thomas; Hafan Gobaith – Eleri Richards, Delyth Rees; Y Tangnefeddwyr – Waldo Williams, Eric Jones; Cyfrinach y Gân – Glenys Roberts, Eric Jones. Darllenodd Catrin Alun gerdd Etifeddiaeth, Gerallt Lloyd Owen.

Roedd gwledd ar ôl y gyngerdd, a phawb yn mwynhau noson hirddydd haf.

Côr Tŷ Tawe yn diddanu yn Nhreforys

Dechreuodd rhaglen 2025 Cymdeithas Gymraeg Treforys gydag adloniant gan Gôr Tŷ Tawe, o dan arweiniad Bethan Wynne Phillips. Merch a’i gwreiddiau yn Nhreforys yw hi, yn wyres i’r athronydd Dewi Z Phillips.

Canodd y côr eitemau gan John Rutter, Islwyn Ffowc Elis, Eric Jones, Karl Jenkins, trefniant Alun Guy o Y Cwm, Huw Chiswell a hanner dwsin o eitemau eraill.

Bydd y côr yn teithio i Lundain ganol Chwefror i ganu gyda Chôr y Boro, yng nghapel y Boro. Dyma daith gyntaf y côr ers i Bethan gymryd at yr awenau.

Cyngerdd yn Ystumllwynarth

Llanwyd eglwys Ystumllwynarth nos Iau, 24 Hydref pan gynhaliwyd cyngerdd i godi arian tuag at Eisteddfod Genedlaethol yr Urdd 2025.

Cafodd y gynulleidfa wledd yn gwrando ar gorau ysgolion Cymraeg Bryn-y-môr a Llwynderw, a hefyd Gôr y Gweilch a Chôr Tŷ Tawe. Ymunodd y corau gyda‘i gilydd ar ddiwedd y gyngerdd i ganu Hafan Gobaith.

Arweiniwyd côr Llwynderw gan Sammy Bond ac Angharad Bean, gyda Bethan Wynne Phillips yn cyfeilio. Linda Willliams oedd arweinydd côr Bryn-y-môr, a Chris Lewis ar y piano. Chris Lewis arweiniodd Gôr y Gweilch a Berian Lewis ar y piano. Bethan Wynne Phillips oedd arweinydd Cór Tŷ Tawe, a Chris Lewis yn cyfeilio.

Ymysg yr uchafbwyntiau roedd Cadwyn Disney gan Lwynderw; Adiemus Karl Jenkins gan Fryn-y-Môr; Sanctus gan Gôr y Gweilch; a’r Cwm, Huw Chiswell, gan Gôr Tŷ Tawe.

Trefnwyd y gyngerdd gan Bwyllgor De Gwyr.

Rhai o sopranos Côr Ty Tawe

Llun: y corau‘n canu Hafan Gobaith gyda Bethan Wynne Phillips yn arwain

Cyngerdd yn Llys Nini

Cynhaliodd Côr Tŷ Tawe gyngerdd ddymunol yn Llys Nini, nos Fercher 16 Hydref. Daeth nifer dda i’r neuadd newydd yn Llys Nini, sy’n ganolfan i’r RSPCA yn Abertawe.

Canodd y côr nifer o ganeuon cysylltiedig ag Abertawe, gan gynnwys Y Cwm a Tangnefeddwyr. Unawdydd dwy gân oedd Bill Gannon.

Llun: Bethan Wynne Phillips a’r côr

Cynhaliodd y côr noson lwyddiannus yn Nhy Tawe, 1 Mawrth, 2023, gan ddathlu’r wyl yn deilwng. Canodd y côr nifer o eitemau, a chafodd y gynulleidfa dda hwyl yn canu detholiad o ganeuon gwerin.