CYNGERDD LLANDEILOFERWALLT

Helen a’r côr

Daeth llond neuadd yn Llandeiloferwallt i glywed cyngerdd haf Côr Ty Tawe nos Lun, Mehefin 19, 2018.  Canodd y côr ddeg o ganeuon Cymraeg, gan gynnwys medli o ganeuon Ryan Davies, Ym Mhenrhyn Gwyr o waith Mererid Hopwood ac Eric Jones, Cân Walter Meic Stevens, Ffalabalam, a Tangnefeddwyr, eto gan Eric Jones.

Canodd Helen Hedd yn y Dyffryn, o waith Nan Lewis ac Eric Jones.  Cafwyd cyflwyniadau o ddarnau barddoniaeth gan Sali Wyn, Heini, Guto, Linda a Catrin. John Evans oedd yn cyfeilio.

Diolchwyd i’r côr gan Prys Morgan.

DATHLU GWYL DDEWI: CHWEFROR 28

Bydd y côr yn canu, danteithion i’w bwyta… croeso arbennig i ddysgwyr.

Dathlu Gwyl Ddewi

DATHLU’R NADOLIG

Sali Wyn yn anrhegu Helen

Cafodd aelodau’r côr amser da yn eu cinio Nadolig ym mwyty’r Tapestri, Abertawe.  Ar ôl gwledd cafwyd sesiwn o ganu, ac aelodau’r côr yn dangos meistrolaeth ar yr eitemau a ddysgwyd yn ystod y tymor.

CANU YN YR YSBYTY

Rhai o’r côr gyda John a Helen

Helen yn barod i arwain

Cafodd aelodau o Gôr Ty Tawe hwyl yn canu yn ysbyty Castell-nedd Port Talbot brynhawn Sul, Tachwedd 19, 2017.  Canodd y côr am awr, gyda Helen yn arwain a John yn cyfeilio.

GERAINT YN SERENNU

Geraint yn canu gyda’i fand, Ffenestri

Mae Geraint James, un o faswyr y côr, yn teithio Cymru, wrth i’w fand, Ffenestri, atgyfodi.  Canodd y band mewn cyngerdd yn Nhy Tawe 30 mlynedd yn ôl, a daeth y band i Dy Tawe ar ddiwedd wythnos y dathlu, Hydref 21.

CYNGERDD DATHLU TY TAWE

Cafodd y côr sylw mawr ar Raglen Heno pan gymerodd ran yn noson gyntaf dathlu Ty Tawe’n 30 oed. Nos Fercher, Hydref 11 oedd hyn. Mwynhaodd pawb naw o eitemau gan y côr a’r canu i bawb.  Dyma noson olaf Helen Gibbon cyn iddi deithio i Batagonia, lle y bydd yn arwain cymanfa ac yn beirniadu mewn eisteddfod yn y Wladfa.  Edrychwn ymlaen at ei chael yn ailafael, ond yn y cyfamser mae John Evans yn arwain ac yn cyfeilio’n ddeheuig.

Côr Ty Tawe yn dathlu’r 30

CAPEL Y WERN

Nos Sul, Medi 24, cymerodd y côr ran mewn Cymanfa Ganu yng Nghapel y Wern, Ystalyfera, gyda Helen Gibbon yn arwain y Gymanfa a’r Côr.  Ymunodd y côr i ganu Benedictus, o waith Robat Arwyn, gyda Chôr Dathlu Cwm Tawe.

RHAGLEN Y GWANWYN

Mae’r côr yn ailgychwyn nos Fercher, Ionawr 10 am 7 o’r gloch.

Bydd y côr yn canu mewn mwy nag un gwasanaeth Plygain, ac yn paratoi ar gyfer cyngherddau’r flwyddyn.

CYNGERDD HAF

Cynhaliodd y côr ei gyngerdd haf yn Nhy Tawe nos Fercher, Gorffennaf 5.  Canodd y côr amrywiaeth o ganeuon gan gynnwys Cadwyn Cariad, trefniant John Evans, Dashenka gan Islwyn Ffowc Elis, Nella Fantasia o waith Chiara Ferràu ac Ennio Morricone, Eryr Pengwern gan Derec Williams, Penri Roberts a Linda Gittins, Rhyfel gan Robert Vaughan ar eiriau Hedd Wyn, Carol Haf gan Rhys Elis o’r Waun a Trysor o Ddawn, casgliad o ganeuon Ryan Davies wedi’u trefnu gan Meirion Jones.

triawd

John

Linda

CYNGERDD LLANDEILOFERWALLT

Cynhaliodd y côr ei gyngerdd blynyddol yn Llandeiloferwallt, nos Lun, Mehefin 19, 2017 i Gymdeithas Gymraeg yr ardal. Canodd Helen ambell unawd a mwynhaodd y côr y noson braf o haf.

Guto’n gwisgo ei het gadeirio

CLWB CINIO MENYWOD CAERFYRDDIN

Y côr yn ymarfer

Cafodd Helen Gibbon wahoddiad i fynd â’i chyfeillion i ganu i Ginio Gwyl Dewi Menywod Caerfyrddin yng Ngwesty Llwyniorwg, nos Wener, Mawrth 3, 2017. Roedd yn anrhydedd i’r côr ei bod hi wedi cynnull parti o blith y côr i ganu yno, a chafwyd noson gofiadwy, gydag eitemau gan Helen a Heledd Evans, gyda John Evans yn cyfeilio. Canwyd detholiad o ganeuon poblogaidd y côr yn ddigopi.

Heledd a John

Helen a Heledd

CAWL A CHAN DYDD GWYL DEWI

Dathlu Gwyl Dewi

Roedd neuadd Ty Tawe’n llawn ar gyfer y noson Cawl a Chân flynyddol. Roedd 6 sosbaned o gawl yn ffrwtian, a llwyth o bice a danteithion eraill i’w mwynhau. Canodd y côr saith o eitemau, a Helen yn canu unawd a chân gyda’r parti merched. Cyfeiliodd John yn ddeheuig yn ôl ei arfer. Roedd cyfle i’r gynulleidfa ymuno mewn chwech o ganeuon. Noson braf o ddathlu ein Cymreictod.

PARTI PLYGAIN Y CôR YN CANU YN LLANDDAROG

Ffurfiodd naw o’r côr barti plygain i ganu yn y Gwasanaeth Plygain a gynhaliwyd yn Eglwys Sant Twrog, Llanddarog, brynhawn Sul, Ionawr 8. Roedd yn noson o ganu plygain braf gan ryw ddeg o bartion, a’r eglwys yn llawn a danteithion a gwin i’r cantorion a’r gynulleidfa. Mwynhaodd y parti wledd yn nhy Janet cyn ymarfer ar gyfer y gwasanaeth.

David, Bill a Helen

Enid, Helen, Linda, Catrin a Janet

Helen yn cyfarwyddo